கிளிநொச்சி SAS தனியார் வைத்தியசாலை கிணற்றில் இருந்து மர்ம வெடிபொருட்கள் மீட்பு

 வெள்ளிக்கிழமை, 24 ஓகஸ்ட் 2012,

 

கிளிநொச்சி டிப்போ சந்திக்கு அருகில் உள்ள SAS தனியார் வைத்தியசாலைக் கிணறு திருத்த வேலைகளின் போது கிணற்றில் இருந்து மர்ம வெடிபொருட்கள் மீட்கப்பட்டுள்ளன.

மேற்படி வைத்தியசாலையில் எதிர்வரும் சனிக்கிழமை 25.08.2012 யாழ்ப்பாணம் ஜெயப்பூர் மையத்தினது ( Jaffna Jaipur Centre for Disability Rehabilitation ) வன்னி மக்களுக்கான இலவச செயற்கை கால் பொருத்தும் நிகழ்வு ஆரம்பிக்க இருந்ததன் நிமித்தம் SAS வைத்தியசாலை நிர்வாகத்தினர் கிணறு மற்றும் மலசல கூட திருத்தவேலைகளை இன்று துரிதப்படுத்தி செய்தனர்.
கிணற்றை இறைத்த போது கிணற்றின் அடியில் மர்ம வெடிபொருட்களை அவதானித்ததும் அவசர அவசரமாக 119 பொலிசாருக்கு தகவல் கொடுத்தனர்.
அதனைத்தொடர்ந்து அங்கு விரைந்த பொலிசாரும் இராணுவத்தினரும் வெடிபொருள் அகற்றும் விசேட பிரிவினரும் அந்த மர்ம வெடிபொருட்களை பத்திரமாக அப்புறப்படுத்தினர்.
இந்நிலையில் நேற்றைய தினம் கிளிநொச்சி பாரதிபுரம் பகுதியில் அமைந்துள்ள கிணறு ஒன்றிலிருந்தும் சில ஆயுதங்கள் மீட்கப்பட்டிருந்தமையும் குறிப்பிடத்தக்கது.