மணிஷர்மாவின் அதிரடி இசையில் வெற்றிச்செல்வன்

Wednesday, 31 October 2012,By.Rajah.

சிருஷ்டி சினிமா தயாரிப்பில், அறிமுக இயக்குனர் ருத்ரனின் இயக்கத்தில் அதிவேகமாக உருவாகி வரும் படம் வெற்றிச் செல்வன்.

இப்படத்தில் கோ படத்தில் வில்லனாக நடித்த அஜ்மலும், தோனி படத்தில் நடித்த ராதிகா ஆப்தேவும் ஜோடியாக நடிக்கின்றனர். ஷாஜஹான், போக்கிரி போன்ற படங்களில் சூப்பர்ஹிட் பாடல்களை கொடுத்த மணிஷர்மா இசையமைக்கிறார். இப்படத்தை இயக்குனர் ருத்ரன் இயக்குகிறார். படம் குறித்து அவர் கூறுகையில், இந்தப் படத்தின் மிகப் பெரிய பலம், பாடல்கள். ஐந்து பாடல்களையும் கார்க்கி எழுதியுள்ளார். பெரிய இடத்துப்பிள்ளை, எப்படி பேசுவார் பழகுவார் என்று தெரியாது. ஒரே ஒரு பாடல் என்று சொல்லி தான் அழைத்தோம். இசையை கொடுத்தவுடன் அடுத்த நாள் அழைத்து ஒரு பல்லவியை சொன்னார், அடுத்த நிமிடமே படத்தின் எல்லா பாடல்களையும் இவர் தான் எழுத வேண்டும் என்று தீர்மானித்து விட்டேன். காதல் வந்து முழுதாய் சொல்ல முடியாமல் தவிக்கும் நிலையை அவர் எழுதியிருந்த வரிகள்... "விட்டு விட்டுத் தூவும் வெட்கங்கெட்ட வானம் கிட்டத் தட்ட என் நெஞ்சமோ?" இந்தப் பாடல் மட்டும் அல்ல, ஐந்து பாடல்களிலும் மணிஷர்மா அவர்களின் இசையும் கார்க்கியின் தமிழும் சேர்ந்து விளையாடியிருப்பதை பார்க்கலாம் எனவும் இயக்குனர் ருத்ரன் கூறியுள்ளார். இப்படத்தின் இசை வெளியீட்டு விழா நாளை மறுதினம் (நவம்பர் 2ம் திகதி) நடைபெற உள்ளது.